Ukrayina Türkiye ile munasebetlerinde Qırım ve qırımtatarlar mevzusını "mümkün qadar" qullanmaq kerek. Bunı Qırım.Aqiqatqa bergen intervyüsında Türkiyedeki Ukrayina elçisi, Qırımtatar Milliy Meclisiniñ birinci reis muavini ve Kremlniñ sabıq mabüsi Nariman Celâl bildirdi.
Onıñ aytqanına köre, al-azırda Qırım mevzusı onıñ diplomatik faaliyetinde müim yer ala.
"Yani, eki devletni birleştirgen mevzu tamam budır, elbette başqalardan ğayrı. Bu bizim eki yönelişte de qullanmaq kerek olğanımızdır: em devletlerimiz arasında munasebetlerni qurmaq içün, em de prezident aytqan vazifeler içün Türkiyeniñ imkânlarını qullanmaq içün. Yani Qırım kün tertibinde qalsın, Qırım mevzusı Ukrayinanıñ territorial bütünligini tiklev, siyasiy mabüslerniñ, arbiy esirlerniñ azat etilmesi, balalarnıñ qaytarılması ve Qırımnı işğalden azat etmeknen bağlı daa çoq meseleler noqta-i nazarından muzakere etilsin dep", — dep ayta Celâl.
Nariman Celâl bu sene quralayda Türkiyedeki elçi olaraq tayinlendi. 2024 senesi ilk qış ayınıñ 20-nde Ukrayina prezidenti Volodımır Zelenskıy Celâlnı bu vazifege tayin etmek niyeti aqqında ilk sefer bildirgen edi. İlk yaz ayınıñ 8-nde Nariman Celâl Ankaradaki Prezident sarayında keçirilgen merasimde Türkiye prezidenti Recep Erdoğanğa işanç yarlıqlarını teslim etti.